பிரபல தெலுங்கு நடிகர் சோபன் பாபு இன்று சென்னையில் மரணம் அடைந்தார். அவருக்கு வயது 71.
வீர அபிமன்யு திரைப்படம் மூலம் பிரபலம் அடைந்தவர் நடிகர் சோபன் பாபு. இவர் ஏராளமான தெலுங்குப் படங்களில் நடித்துள்ளார். இவர் நடித்த படங்கள் தமிழ், கன்னட மொழிகளிலும் டப்பிங் செய்யப்பட்டுள்ளன.
துவக்கம் முதலே சென்னையில் தங்கியிருந்த சோபன்பாபு யோகாசனம் செய்வதை வழக்கமாகக் கொண்டிருந்தார்.
இன்று காலை யோகாசனத்தில் ஈடுபட்டிருந்த போது, திடீரென்று பாதிப்பு ஏற்பட்டது. இதையடுத்து சென்னையில் உள்ள தனியார் மருத்துவமனையில் குடும்பத்தினர் அனுமதித்தனர். ஆனால் சிகிச்சை பலனின்றி அவரது உயிர் பிரிந்தது.
ஆந்திர மாநில அரசின் நந்தி விருது, ஃபிலிம்பேர் விருது உட்பட ஏராளமான விருதுகளைப் பெற்றுள்ளார்.
சோபன் பாபுவின் மறைவு குறித்து தெலுங்கு திரையுலகினர் மட்டுமின்றி தமிழ்த் திரையுலகினரும் அதிர்ச்சி வெளியிட்டுள்ளனர்.